Jeruzalem

Article in other languages:

Jeruzalem zo ur gêr eus ar reter-tost en deus ul lec'h a-bouez er relijionoù hebraek, kristen ha musulmat, hag er spered broadel israelian. Hec'h anv zo ירושלים Yerushalayim e hebraeg, القدس, al Quds evit an arabegerien vusulmat pe اورشليم Ûrshalîm evit an arabegerien gristen. An anv ofisiel en israel zo « Yerushalayim Ûrshalîm al Quds ». Disklêriet en deus stad Israel e oa Jeruzalem unvanet he « c'hêrbenn peurbad ». N'eo ket anavezet an doare-se da lavaret gant ar gumuniezh etrebroadel. Reter Jeruzalem a vez sellet outañ evel un dachenn dindan dalc'h gant Palestiniz a c'houlenn anezhi da gêrbenn ur stad palestinian da zont.

Savet eo bet ar gêr war ar menez Sion, da 745 m uhelder. E deroù 2005, e oa 200 km² dindani evit 704 900 annezad. Kavout a reer mesk-ha-mesk er gêr-se un niver a relijionoù, a bobloù, hag a strolladoù sokial. Gronnet eo al lodenn anvet « ar gêr gozh » gant mogerioù-kreñv ha kavout a reer enni daou garter poblet gant arabed dreist-holl, anvet karter kristen ha karter musulmat , ur c'harter armeniat hag ur c'harter yuzev.

Jeruzalem gwelet diouzh menez an Olivez (Bolz-to ar Roc'h hag, a-dreñv, Bolz-to ar Bez Santel; a-zehou, an nor alaouret, stanket gant ur voger, ma tremeno ar Mesiaz pa vo distro, a-hervez.